Ministrja e Shëndetësisë dhe Mbrojtjes Sociale, Albana Koçiu e shoqëruar edhe nga ministrja e Turizmit dhe Mjedisit, Mirela Kumbaro ka vizituar ambientet e transformuara të Qendrës Shëndetësore Libohovë në të cilët rreth 4500 banorë të saj marrin shërbime cilësore dhe në kohë pranë vendbanimit.

Koçiu theksoi se kjo qendër tashmë me kushte bashkëkohore u vjen në ndihmë të gjithë banorëve për shërbimet që ofrohen që nga kontrolli bazë falas mjekësor si dhe vaksinimi falas kundër gripit dhe HPV-së.
Ministrja Koçiu shprehet se stafi i mjekëve dhe infermierëve i janë përgjigjur edhe fluksit të virozave të dimrit me një mbulesë të lartë të vaksinës kundër gripit te grupet e riskuara.

Ajo bën të ditur se në Qendrën Shëndetësore Libohovë janë aplikuar deri tani rreth 500 doza të vaksinës kundër gripit te grupet e riskuara ndërsa vijon kryerja e vaksinës kundër HPV për vajzat mbi 13 vjeçe si dhe për gratë e moshës 40-49 vjeçe.

“E lumtur kur takuam edhe vogëlushen 14- vjeçare e cila ishte në pritje për të kryer vaksinën e HPV-së”, shprehet ministrja e Shëndetësisë.
Ministria e Shëndetësisë dhe Mbrojtjes Sociale ka siguruar dozat e vaksinave në të gjithë vendin për grupet e riskuara, fëmijët, të moshuarit dhe gratë shtatzëna.

Me Mirela Kumbaro Furxhi dhe Flamur Golemi u takuam në një bisedë të ngrohtë me miq gjirokastritë në pension të cilët janë edhe përfitues të shërbimeve mjekësore e paketave shëndetësore falas, për të diskutuar për nevojat e tyre dhe për t’u konsultuar mbi çfarë mund të bëjmë më shumë!

Rikonstruksioni i spitalit të Gjirokastrës që fillon brenda këtij viti është po ashtu lajm i mirë në mozaikun e shërbimeve socio-shëndetësore për më të moshuarit “